Saat24.Az xəbər verir ki,Ağdaş Regional Mədəniyyət İdarəsinə rəisi Səxavət Məmmədov Novruz bayramı münasibəti ilə həmkarlarını təbrik edib.
Təbrik mətnini olduğu sizə təqdim edirik.
Hörmətli həmkarlar!
Sizi, Sizin şəxsinizdə bütün xalqımızı əziz Novruz bayramı münasibəti ilə ürəkdən təbrik edir, hamınıza cansağlığı, səadət və işlərinizdə böyük uğurlar arzulayıram.
Təbiətin oyanış fəsli yazın müjdəçisi olan Novruz bayramı tarixən insanlarımız tərəfindən birlik, mehribanlıq, qardaşlıq rəmzi kimi qarşılanmış, sevilmiş və böyük məhəbbətlə qeyd olunmuşdur. Milli varlığımızı və ulu babalarımızın mənəvi aləminin zənginliyini bütün incəlikləri ilə əks etdirən bu el bayramı əsrlərin sınağından çıxmış gözəl adət-ənənələri ilə bu gün də xalqımız tərəfindən sevilir və uca tutulur. Novruzun gəlişi insanlarda ülvi duyğular oyadır, hər kəsə sonsuz sevinc və fərəh bəxş edir.
Hər yerdə bir oyanış, yeniləşmə, təzəlik hiss olunur.
Ümummilli liderimiz Heydər Əliyevin xalqımız qarşısındakı misilsiz xidmətlərinin, milli mənəvi dəyərlərimizə verdiyi böyük qiymətin nəticəsidir ki, Novruz bayramı bu gün ölkəmizdə rəsmi səviyyədə geniş qeyd olunur. Xalqımız özünün sevimli bayramını cəmiyyətin bütün təbəqələri arasında möhkəm birlik nümayiş etdirməklə ölkə Prezidenti cənab İlham Əliyevin rəhbərliyi altında həyatın bütün sahələrində qazandığı uğurlarla qarşılayır.
Novruz həm də həmrəylik bayramıdır. Milli həmrəyliyimizin rəmzinə çevrilmiş bu bayramı dünyanın müxtəlif ölkələrində yaşayan həmvətənlərimiz də təntənə ilə qeyd edirlər. Novruz bütün dünyadakı soydaşlarımızın azərbaycançılıq məfkurəsi ətrafında daha da sıx birləşməsinə kömək edir, onlarda Vətənə bağlılıq hisslərini gücləndirir.
Torpaqlarımızın müdafiəsi zamanı Şəhid olmuş qəhrəmanlarımızın əziz xatirəsini ehtiramla yad edir, bütün Şəhid və döyüşlərdə sağlamlığını itirən hərbi qulluqçuların ailələrinə, Vətənimiz üçün layiqli övladlar böyüdən əsgər analarına bayram təbriklərimi çatdırır, yüksək hörmət və ehtiramımı ifadə edirəm.
Əziz bayram günlərində xalqımıza, mədəniyyət işçilərinə Novruz ovqatı, bahar əhvali-ruhiyyəsi arzu edirəm.
Novruz bayramınız mübarək olsun!
Ağdaş Regional Mədəniyyət İdarəsinin rəisi Səxavət Məmmədov
